VicksWeb upgrade Location upload ads trending
VicksWeb இந்தியா
கர்நாடகாவின் காலாபுராகியில் தெருநாய்கள் கடித்து குதறியதில் 10க்கும் மேற்பட்ட குழந்தைகள் காயம்!
Source:  Dinakaran.com
Monday, 22 October 2018 23:11

காலாபுராகி: கர்நாடக மாநிலம் காலாபுராகியில் தெருநாய்கள் கடித்து குதறியதில் 10க்கும் மேற்பட்ட குழந்தைகள் காயமடைந்துள்ளனர். கர்நாடக மாநிலம் ஜெவார்கி மாவட்டம் காலாபுராகியில் உள்ள அமன் நகர் பகுதியில் ஏராளமான தெரு நாய்கள் சுற்றித் திரிகின்றன. இந்நிலையில், நேற்று அந்த பகுதியில் பள்ளி குழந்தைகள் ஏராளமானோர் விளையாடிக் கொண்டிருந்தனர். அப்போது, அங்கிருந்த தெரு நாய்கள் சற்றும் எதிர்பாரத விதமாக குழந்தைகளை கடித்தன. இதில், 10க்கும் மேற்பட்ட குழந்தைகள் படுகாயமடைந்தனர். இச்சம்பவத்தை கண்ட அருகில் இருந்தவர்கள் மற்றும் பெற்றோர்கள், குழந்தைகளை மீட்டு சிகிச்சைக்காக மாவட்ட அரசு மருத்துவமனையில் சேர்த்தனர்.குழந்தைகள் அனைவரும் மருத்துவமனையில் தீவிர சிகிச்சை பெற்று வருகின்றனர். இதுகுறித்து பேசிய குழந்தைகளின் பெற்றோர்கள், காலாபுராகியில் சுற்றித்திரியும் ஏராளமான தெருநாய்களை பிடிக்காமல் மாவட்ட நிர்வாகம் அலட்சியமாக இருந்ததே இந்த சம்பவத்திற்கு காரணம் என குற்றம்சாட்டியுள்ளனர். இந்த சம்பவத்தையடுத்து தெருநாய்களை பிடிப்பதற்கான நடவடிக்கைகள் எடுக்கப்பட்டிருப்பதாக கூறப்படுகிறது. முன்னதாக, கடந்த ஜூலை மாதம் ஜெவார்கி பகுதியில் ஏழு வயது சிறுவன், தனது பள்ளி அருகே விளையாடிக் கொண்டிருந்தபோது, தெருநாய் ஒன்று கடித்தது. இதில், அந்த சிறுவன் உடல் முழுவதும் படுகாயம் ஏற்பட்டது குறிப்பிடத்தக்கது.


இந்தியாவில் கோடீஸ்வரர்களின் எண்ணிக்கை கடந்த 4 ஆண்டுகளில் 68% அதிகரிப்பு : மத்திய நிதித்துறை அமைச்சகம்
Source:  Dinakaran.com
Monday, 22 October 2018 22:53

டெல்லி : இந்தியாவில் கோடீஸ்வரர்களின் எண்ணிக்கை கடந்த 4 ஆண்டுகளில் 68% அதிகரித்துள்ளது. இத்தகவலை மத்திய நேரடி வரிகள் வாரியம் தெரிவித்துள்ளது. 2017-18 வருமானவரி தாக்கலின் படி 1,40,139 பேரின் ஆண்டு வருமானம் ரூ.1 கோடிக்கு மேல் இருப்பதாக கணக்கு தாக்கல் செய்யப்பட்டுள்ளது.இதனிடையே  வருமானவரி தாக்கல் செய்வோரின் எண்ணிக்கை 3.31 கோடியில் இருந்து 5.44 கோடியாக அதிகரிக்கப்பட்டுள்ளது. 2014-2015ம் நிதி ஆண்டில் ஒரு கோடி ரூபாய் வருமானம் இருப்பதாக 48,416 பேர் வருமான வரித்துறையிடம் தெரிவித்திருப்பதாகவும் 2017-18ம் ஆண்டில் இது 60% அதிகரித்து 81, 344 ஆக இருப்பதாகவும் தெரிவிக்கப்பட்டது.  வணிக நிறுவனங்கள், பல்வேறு அமைப்புகள் கூட்டு குடும்பங்கள் வகையிலும் கோடீஸ்வர வருமான வரிதாரர்கள் எண்ணிக்கை 60% அதிகரித்து இருப்பதாக  மத்திய நேரடி வரிகள் வாரியம் தெரிவித்துள்ளது. கடந்த 4 நிதி ஆண்டுகளில் வருமான வரிக் கணக்கு தாக்கல்களின் எண்ணிக்கை 80% ஆக அதிகரித்துள்ளதாகவும் தெரிவிக்கப்பட்டுள்ளது. சட்ட ரீதியாக அரசும் வருமான வரித்துறை அதிகாரிகளும் மேற்கொண்ட பல்வேறு நடவடிக்கைகளால் வரி வசூல் அதிகரித்துள்ளதாகவும் அதிக வருவாய் பிரிவினர் வரி வலைக்குள் வந்துள்ளதாகவும் நேரடி வரிகள் வாரியத் தலைவர் சுஷில் சந்திரா தெரிவித்துள்ளது குறிப்பிடத்தக்கது.


அமித் ஷாவுக்கு பிரதமர் மோடி ட்விட்டரில் பிறந்தநாள் வாழ்த்து
Source:  Dinakaran.com
Monday, 22 October 2018 22:36

டெல்லி: பாஜக தேசியத் தலைவர் அமித் ஷாவுக்கு பிரதமர் நரேந்திர மோடி டிவிட்டரில் பிறந்தநாள் வாழ்த்து தெரிவித்துள்ளார். பாஜக தேசியத் தலைவர் அமித் ஷா இன்று தனது 54 வது பிறந்தநாளை கொண்டாடுகிறார். இது தொடர்பாக ட்விட்டரில் பதிவிட்டுள்ள பிரதமர் மோடி, அமித்ஷாவின் தலைமையின் கீழ், பாஜக குறிப்பிடத்தக்க அளவில் விரிவடைந்திருப்பதாக கூறியுள்ளார். அமித்ஷாவின் கடுமையான உழைப்பே, பாஜகவின் சொத்து என்ற அவர், நீண்டநாள் நலமுடன் வாழவும் பிரதமர் மோடி வாழ்த்தியுள்ளார். மேலும் அமித் ஷாவுக்கு மத்திய அமைச்சர்கள் மற்றும் பாஜக உறுப்பினர்கள் என பல்வேறு தரப்பினர் பிறந்தநாள் வாழ்த்து தெரிவித்து வருகின்றனர்.


ஊழல் குற்றச்சாட்டு எதிரொலி...சிபிஐ அதிகாரிகளுக்கு பிரதமர் மோடி அழைப்பு
Source:  Dinakaran.com
Monday, 22 October 2018 22:32

டெல்லி: சிபிஐ இயக்குநர் அலோக் வர்மா, துணை இயக்குநர் ராகேஷ் அஷ்தானாவுக்கு பிரதமர் மோடி அழைப்பு விடுத்துள்ளார். இருவரும் ஒருவருக்கொருவர் ஊழல் குற்றச்சாட்டு கூறிய நிலையில் இருவரும் நேரில் வந்து விளக்கம் அளிக்குமாறு பிரதமர் மோடி உத்தரவிட்டிருப்பதாக தகவல் வெளியாகியுள்ளது.


இந்தியாவில் கோடீஸ்வரர்களின் எண்ணிக்கை 60%ஆக அதிகரிப்பு: மத்திய நிதித்துறை அமைச்சகம்
Source:  Dinakaran.com
Monday, 22 October 2018 22:17

டெல்லி: இந்தியாவில் கோடீஸ்வரர்களின் எண்ணிக்கை 60%ஆக அதிகரித்துள்ளது என்று மத்திய நிதித்துறை அமைச்சகம் தெரிவித்துள்ளது. 2017-18 வருமானவரி தாக்கலின் படி 1,40,139 பேரின் ஆண்டு வருமானம் ரூ.1 கோடிக்கு மேல் என கணக்கு தாக்கல் செய்யப்பட்டுள்ளது. வருமானவரி தாக்கல் செய்வோரின் எண்ணிக்கை 3.31 கோடியில் இருந்து 5.44 கோடியாக அதிகரித்து உள்ளது குறிப்பிடத்தக்கது.


முகலாயர்களுடன் தொடர்புடைய நகரங்களின் பெயரை மாற்ற வேண்டும்: மத்திய அமைச்சர் கிரிராஜ் சிங்
Source:  Dinakaran.com
Monday, 22 October 2018 21:32

பாட்னா: நாடு முழுவதும் முகலாயர்களுடன் தொடர்புடைய நகரங்களின் பெயரை மாற்ற வேண்டும் என மத்திய அமைச்சர் கிரிராஜ் சிங் கூறியுள்ளார். கடந்த வாரம் நடைபெற்ற உத்தரப்பிரதேச மாநில அமைச்சரவைக் கூட்டத்தில் அலாகாபாத் நகரின் பெயரை பிரயாக்ராஜ் என்று மாற்றும் திட்டத்துக்கு ஒப்புதல் அளிக்கப்பட்டது. இந்த முடிவுக்கு பல்வேறு எதிர்ப்புகளும் ஆதரவும் கிடைத்தன. இந்நிலையில், பீகார் தலைநகர் பாட்னாவில் செய்தியாளர்களிடம் பேசிய, சிறு குறு நடுத்தரத் தொழில்கள் துறை அமைச்சரான கிரிராஜ் சிங், அலகாபாத்தின் முன்னாள் பெயர் பிரயாக், இது 16ம் நூற்றாண்டில் முகலாய பேரரசர் அக்பரால் மாற்றப்பட்டுள்ளது என கூறியுள்ளார். மேலும், பீகாரைக் கொள்ளையடித்தவர் கில்ஜி என்றும் பக்தியார்பூருக்கு அவர் பெயர் சூட்டப்பட்டுள்ளதாகவும் அவர் குறிப்பிட்டுள்ளார். பீகாரின் அக்பர்பூர் உட்பட நூற்றுக்கு மேற்பட்ட இடங்களின் பெயரை மாற்ற வேண்டும் என அவர் வலியுறுத்தியுள்ளார். உத்தரப்பிரதேசத்தில் முகலாயர் காலத்தில் சூட்டப்பட்ட பெயர்களை மாற்றி மீண்டும் பழைய பெயரைச் சூட்ட முதலமைச்சர் யோகி ஆதித்யநாத் எடுத்துள்ளது நல்ல நடவடிக்கை என கிரிராஜ் சிங் கூறியுள்ளார். பீகார் உட்பட நாடு முழுவதும் முகலாயர்களுடன் தொடர்புள்ள பெயர்கள் அனைத்தையும் மாற்ற வேண்டும் என்றும் அவர் வலியுறுத்தியுள்ளார்.


கன்னியாஸ்திரி பாலியல் வழக்கில் திடீர் திருப்பம் : பிஷப் பிராங்கோவுக்கு எதிராக சாட்சி கூறிய பாதிரியார் மர்மமரணம்
Source:  Dinakaran.com
Monday, 22 October 2018 21:19

சண்டிகர் : ஜலந்தர் பிஷப் பிராங்கோவுக்கு எதிராக சாட்சி கூறிய பாதிரியார் குரியகோஸ் மர்மமான முறையில் மரணம் அடைந்துள்ளார். பஞ்சாப் மாநிலம் ஹோசியார்பூரில் இறந்த நிலையில் பாதிரியார் உடல் மீட்கப்பட்டுள்ளது. முன்னதாக கன்னியாஸ்திரியை பலாத்காரம் செய்ததாக கேரள கோர்ட்டில் பிராங்கோ மீது வழக்கு தொடரப்பட்டது. பிஷப் பிராங்கோ கேரளத்தில் பணியாற்றிய போது தன்னை பலமுறை பாலியல் பலாத்காரம் செய்ததாக  கன்னியாஸ்திரி ஒருவர் தெரிவித்தார். இதனையடுத்து  பிஷப் பிராங்கோ மீது வழக்குப்பதிவு செய்யப்பட்டது. இந்த வழக்கில் கேரள காவல்துறையினரின் குற்றப் புலனாய்வு பிரிவினரால் கைது செய்யப்பட்டு விசாரிக்கப்பட்ட பிராங்கோ தற்போது பிணையில் வெளிவந்து பஞ்சாப் மாநிலம் ஜலந்தரில் உள்ளார்.பிஷப் பிராங்கோ மீது கன்னியாஸ்திரி பாலியல் பலாத்கார குற்றச்சாட்டு தெரிவிப்பதற்கு உதவியதாக கூறப்பட்டவர் பாதிரியார் குரியகோஸ் ஆவார். இந்த வழக்கில் முக்கிய சாட்சியாக சேர்க்கப்பட்டிருந்த அவர், பிஷப் பிராங்கோவால் பாலியல் பலாத்காரம் செய்யப்பட்ட கன்னியாஸ்திரிகள் பலர் தன்னிடம் புகார் கூறியதாக தெரிவித்திருந்தார். இதனால் தனக்கு பலமுறை கொலை மிரட்டல்கள் வந்ததாகவும் பாதிரியார் குரியகோஸ்  கூறினார். இந்த நிலையில் ஜலந்தர் மாவட்டத்தில் உள்ள அன்னை மேரி தேவாலயத்தில் தனது அறையில் பாதிரியார் குரியகோஸ் இறந்து கிடந்தார். பிஷப் பிராங்கோவுக்கு எதிரான முக்கிய சாட்சியம் என்பதால்  பாதிரியார் குரியகோஸ் கொல்லப்பட்டு இருக்கலாம் என அவரின் சகோதரர் ஜோஸ் கூறியுள்ளார்.தனது உயிருக்கு அச்சுறுத்தல் உள்ளதாக தன்னிடம் தனது சகோதரர் தெரிவித்ததாகவும் ஜோஸ் தெரிவித்துள்ளார்.


சன்னி லியோனுக்கு எதிராக பெங்களுருவில் கர்நாடக ரக் ஷன வேதிகே அமைப்பினர் போராட்டம்
Source:  Dinakaran.com
Monday, 22 October 2018 20:53

பெங்களூரு: சன்னி லியோனுக்கு எதிராக பெங்களுருவில் கர்நாடக ரக் ஷன வேதிகே அமைப்பினர் போராட்டம் நடத்தி வருகின்றனர். வீரமாதேவி படத்தில் சன்னி லியோன் நடிக்க எதிர்ப்பு தெரிவித்து அவரது படத்தை எரித்து போராட்டம் நடத்தப்படுகிறது. தமிழில் எடுக்கப்படும் வீரமாதேவி படம் கன்னடா, தெலுங்கும், மலையாளம் மற்றும் இந்தியிலும் வெளியாகியுள்ளது குறிப்பிடத்தக்கது.


சிறைபிடிக்கப்பட்ட தமிழக மீனவர்கள் கேரள மீன்வளத்துறையினரிடம் ஒப்படைப்பு
Source:  Dinakaran.com
Monday, 22 October 2018 19:32

திருவனந்தபுரம்: மங்களூரில் இருந்து மீன்பிடிக்க சென்று கேரள மீனவர்களால் சிறைபிடிக்கப்பட்ட ராமநாதபுர மீனவர்கள் 40 பேர், கேரள மீன்வளத்துறையினரிடம் ஒப்படைக்கப்பட்டுள்ளனர். கேரளாவில் உள்ள தமிழக மீனவர்களை மீட்க வேண்டும் என அரசுக்கு உறவினர்கள் கோரிக்கை விடுத்துள்ளனர்.


திருவொற்றியூர் நூலகம் வடசென்னை மக்களுக்கு பெரிய வரப்பிரசாதம்
Source:  Makkal Kural
Monday, 22 October 2018 18:30

சென்னை, அக்.22–

திருவொற்றியூரில் உள்ள கிளை நூலகம் தமிழகத்தின் முன்மாதிரி நூலகமாக திகழ்ந்து பல்வேறு விருதுகளை வாங்கி சாதனை படைத்துள்ளது.

இந்த நூலகம் வடசென்னை மக்களுக்கு பெரிய வரப்பிரசாதமாகும்.

திருவொற்றியூர் தொகுதி முன்னாள் எம்.எல்.ஏ.வான கே.குப்பனின் தீவிர இடைவிடாத முயற்சி காரணமாக அவரது தொகுதி மேம்பாட்டு நிதி 82 லட்சம் ரூபாய் மற்றும் பொது நூலக துறை நிதி 9 லட்சத்து 90 ஆயிரம் என சுமார் 92 லட்சம் ரூபாய் செலவில் இந்த நூலகம் பிரமாண்டமாக உருவாக்கப்பட்டிருக்கிறது.22 ஆயிரத்து 130 நூலகர்கள் உள்ளனர். இது தமிழகத்திலேயே முதலிடமாகும். புரவலர் வைப்பு தொகை வைத்திருப்பதிலும் தமிழகத்தில் முதலிடம் நன்கொடை பொருட்களை பெறுவதிலும் முதலிடம் பெற்று பல்வேறு விருதுகளை வாங்கி குவித்து இந்த நூலகம் நிமிர்ந்து நிற்கிறது.

தமிழக அரசின் பொது நூலகத் துறை, திருவள்ளூர் மாவட்ட நூலக ஆணைக் குழுவின் கீழ், சென்னை திருவொற்றியூர், சண்முகனார் பூங்கா அருகே 1958ல் இருந்து கிளை நூலகம் செயல்பட்டு வருகிறது.

திருவொற்றியூர் நகராட்சியாக இருந்தபோது இட நெருக்கடியால், 2003ல் 4 லட்ச ரூபாய் செலவில், 760 சதுர அடியில், இந்த நூலகம் விரிவாக்கம் செய்யப்பட்டது.

நூலகத்தின் வளர்ச்சிக்கு இந்த இடமும் கட்டிடமும் போதாது என்பதால், வாசகர் வட்டத்தினரால் அப்போதைய எம்.எல்.ஏ. குப்பனிடம் நூலகத்தை விரிவாக்கம் செய்ய நிதி கோரப்பட்டது.

பழைய கட்டிடத்தை முழுமையாக இடித்து, 4 தளங்கள் கொண்ட நூலகம் கட்டப்பட்டுள்ளது.

இந்த நூலகம் பல நவீன வசதிகளுடன் டிஜிட்டல் நூலகமாக மாற்றப்பட்டு, 2015ல் திறக்கப்பட்டது.

இங்கு, நூலக உறுப்பினர் சேர்க்கை கட்டணமாக 30 ரூபாயும், ஆண்டு சந்தா புதுப்பிப்பதற்கு 10 ரூபாயும் பெறப்படுகிறது. நவீன வசதிகளுடன் அமைந்துள்ள இந்த நூலகம், திருவொற்றியூர் சுற்று வட்டார, மாணவ, மாணவியருக்கு மட்டுமன்றி வாசர்கள், பொதுமக்களுக்கான அறிவுக் கோவிலாக அமைந்துள்ளது.

மாதந்தோறும், நூலக வாசகர் வட்டம் சார்பில், மாதத்தில் 2வது சனிக்கிழமை, சிந்தனைக் குரல் என்ற தலைப்பில் கருத்தரங்க கூட்டம் நடைபெற்று வருகிறது.

பேச்சாளர்கள்

இதுவரை, 29 கூட்டங்கள் நடத்தப் பட்டுள்ளன. 3 மாத இடைவெளியில் சிந்தனை சாரலின் கருத்தரங்க கூட்டம், தனியார் பள்ளி வளாகத்தில், 1000க்கும் மேற்பட்டோர் பங்கேற்கும் வகையில் பெரிய அளவில் நடத்தப்பட்டு வருகிறது.

இந்நிகழ்வில், சுகிசிவம், பர்வீன் சுல்தானா, தமிழருவி மணியன், கலியமூர்த்தி, ரம்யா உள்ளிட்ட பேச்சாளர்கள் மற்றும் எழுத்தாளர்கள் பங்கேற்று உள்ளனர்.

உலக புத்தக தினத்தை முன்னிட்டு, விளையாட்டு போட்டிகள் மகளிர் திறன் மேம்பாட்டு பயிற்சி, யோகா, பேரணி போன்ற நிகழ்வுகளும் இந்நூலகத்தின் சார்பில் நடத்தப்பட்டு வருகின்றன.

கொடையாளர், புரவலர்களால் வழங்கப்பட்ட, 15.29 லட்சம் ரூபாய், அசோக் லேலண்டு சமூக வளர்ச்சித் திட்டம் சார்பில், 15 லட்சம் ரூபாய் மதிப்பீட்டில் தளவாடப் பொருட்கள் கிடைத்துள்ளன.

ரூ.10 லட்சம் கணினிகள்

எச்.சி.எல்., அறக்கட்டளை சார்பில் 10 லட்ச ரூபாய் மதிப்புள்ள 28 கணினிகள், ஜி. வரதராஜன் உள்ளிட்ட நால்வரால் 6.19 லட்சம் ரூபாய் மதிப்பிலான 16 கண்காணிப்பு கேமிராக்கள், 16 ஒலிபெருக்கிகள் உள்ளிட்ட பொருட்கள் கிடைத்துள்ளன.

ஐ.டி.சி. லிமிடெட் நிறுவனம் வழங்கிய, 1.64 லட்சம் ரூபாய் மதிப்பிலான டி.வி. மற்றும் நாற்காலிகள், நன்கொடையாக கிடைத்துள்ளது.

50 லட்ச ரூபாய்க்கும் மேல் மதிப்புள்ள புத்தகங்கள் என, ஒட்டு மொத்தமாக 2.5 கோடி ரூபாய் மதிப்பீட்டுடன், இந்நூலகம், உலகத் தரத்திற்கு இணையாக உயர்ந்துள்ளது.

நூலகத்தில் உள்ள கணினி மூலம், தற்போது வரை 172 மாணவ, மாணவிகளுக்கு இலவச திறன் மேம்பாட்டு பயிற்சி, எச்.சி.எல். நிறுவனம் மற்றும் வாசகர் வட்டத்தால் வழங்கப்பட்டு வேலைவாய்ப்பு பெற்று தரப்பட்டுள்ளது.

இங்கு, 2,500க்கும் மேற்பட்ட, மாணவ, மாணவிகளுக்கு, 740 மகளிருக்கு இலவச கணினி பயிற்சி கற்றுக் கொடுக்கப்பட்டுள்ளது.

கடந்த மார்ச் மாதம் 20–ந் தேதி அன்று பள்ளி கல்வித்துறை அமைச்சர் கே.ஏ. செங்கோட்டையன் இந்த நூலகத்திற்கு வந்தார். அங்கு காது கேளாதோர், வாய் பேசாதோருக்கு கம்ப்யூட்டர் வசதியுடன் சிறப்பு பிரிவை துவக்கி வைத்தார். அப்போது அங்கிருந்தவர்கள் இந்த நூலகத்தில் போட்டி தேர்வுகளுக்கான பயிற்சி அளிக்க வேண்டும் என்று கோரிக்கை வைத்தார்கள். இதனை ஏற்ற அமைச்சர் செங்கோட்டையன் ஏப்ரல் 23–ந் தேதி அன்று போட்டி தேர்வுக்கான பயிற்சி அளிப்பதற்கு அமைச்சர் அனுமதி அளித்தார். அதனை தொடர்ந்து மே 8–ந் தேதி முதல் இங்கு பயிற்சி வகுப்புகள் நடத்தப்படுகின்றன என நூலகர் பானிக் பாண்டியன் தெரிவித்தார்.

ஐ.ஏ.எஸ். தேர்வுக்கு பயிற்சி

ஐ.ஏ.எஸ்., ஐ.பி.எஸ். தேர்வுக்கு பயிற்சி அளிக்கப்படுகிறது. தமிழ்நாடு பப்ளிக் சர்வீஸ் கமிஷன், ரெயில்வேயில் பணியில் சேருவதற்கான தேர்வு, வங்கி தேர்வு உட்பட பல்வேறு தேர்வுகளுக்கு இங்கு பயிற்சி அளிக்கப்படுகிறது என்றும் அவர் தெரிவித்தார்.

பயிற்சி வகுப்பில் சேர 200–க்கும் மேற்பட்டவர்கள் முன்பதிவு செய்திருக்கிறார்கள். இதுவரை இதுபோன்று தேர்வு பயிற்சிக்கு வடசென்னை பகுதி இளைஞர்கள், மாணவர்கள் அண்ணா நகர், தி.நகர் போன்ற தென்சென்னை பகுதிகளுக்கு தனியார் நிறுவனங்களுக்கு செல்லும் நிலை இருந்தது. பெரும்பாலானோருக்கு தனியார் பயிற்சி நிலையத்தில் பயிற்சி பெற கட்டணம் செலுத்த முடியாத நிலை இருந்தது.

வரப்பிரசாதம்

இந்த நிலையில் திருவொற்றியூரில் இதுபோன்று இலவச பயிற்சி வகுப்பு அமைக்கப்பட்டுள்ளது. வடசென்னை பகுதி இளைஞர்களுக்கு பெரிய வரப்பிரசாதமாகும். இங்கு பயிற்சி பெற தண்டையார்பேட்டை, வண்ணாரப்பேட்டை, மணலி, எண்ணூர், பொன்னேரி என சுற்று வட்டார பகுதிகளில் இருந்து இளைஞர்கள் வந்து பங்கேற்கிறார்கள்.

இந்த நூலகத்தில் 12 ஊழியர்கள் பணியாற்றுகிறார்கள். அவர்கள் அனைவருமே அர்ப்பணிப்பு உணர்வுடன், பணி செய்கிறார்கள். நூலகத்திற்கு வருவோரை அன்புடன் வரவேற்று அவர்களுக்கு தேவையான நூல்களை கொடுக்கிறார்கள். இங்கு 1–ம் வகுப்பு முதல் 12ம் வகுப்பு வரை உள்ள பாட புத்தகங்களும் இடம் பெற்றுள்ளன.

போட்டி தேர்வுக்கான பயிற்சி வகுப்புகள் ஞாயிறு தோறும் காலை 9.30 மணி முதல் 5.30 மணி வரை நடைபெறுகிறது. ஆன்லைனில் தேர்வுகள் நடத்தப்படுகின்றன. 2 மாதத்துக்கு ஒருமுறை இந்த தேர்வு நடைபெறுகிறது. இங்கு பயிற்சி வகுப்பு நடத்தும் பல்வேறு துறை நிபுணர்கள், ஆசிரியர்கள் எந்தவித பிரதிபலனும் பாராமல் எந்த ஊதியமும் இல்லாமல் அர்ப்பணிப்புடன் வந்து பயிற்சி அளிக்கிறார்கள்.

கதை சொல்லும் நேரம்

குழந்தைகளுக்கு ‘கதை சொல்லும் நேரம்’ என்ற நிகழ்வு சனி, ஞாயிற்றுகிழமைகளில் மாலை 4 மணி முதல் 6 மணி வரை நடைபெறுகிறது. குழந்தைகளுக்கு நல்லொழுக்கம் சொல்லி தரப்படுகிறது. நீதி போதனை கதைகள் எடுத்து சொல்லப்படுகிறது. குழந்தைகளே கதை சொல்லும் நிகழ்ச்சிகளும் நடைபெறுகின்றன. ‘படித்ததில் பிடித்தது’ என்ற தலைப்பில் சிறுவர்கள் பேசுகிறார்கள். குழந்தைகள் பிரிவு மிகவும் சிறப்பாக குழந்தைகளை ஈர்க்கும் வகையில் சேர்கள் போடப்பட்டு மிக அருமையாக உள்ளது.

வேலைவாய்ப்பு பெறும் வகையில் அடிப்படை கம்ப்யூட்டர் பயிற்சியும் அளிக்கப்படுகிறது. ‘Tally’யும் சொல்லி தரப்படுகிறது. இங்கு மொத்தம் 33 கம்ப்யூட்டர்கள் உள்ளன. 10–ம் வகுப்பு வரை படித்தவர்கள், இல்லத்தரசிகள் பலர் ஆர்வமுடன் வந்து கம்ப்யூட்டர் பயிற்சி பெறுகிறார்கள்.

பயிற்சிக்குப் பின் ஏராளமானனோருக்கு வேலைவாய்ப்பும் கிடைத்துள்ளது.

நூலக பிரிவுகள்

1. பார்வையற்றோர், மாற்றுத்திறனாளிகள் சிறப்பு பிரிவு, 2. நாளிதழ், பருவ இதழ்கள் பிரிவு, 3. மகளிர் பிரிவு, 4. நூல் வழங்கும் பிரிவு, 5. சிறுவர் பிரிவு, 6. குடிமைப்பணி பயிற்சி மைய பிரிவு, 7. இணையதளம், 8. நகலக பிரிவு, 9. சொந்த நூல்கள் படிப்பகம், 10. காது கேளாதோர் மற்றும் வாய் பேச இயலாதோர் சிறப்பு பிரிவு (தமிழகத்திலேயே முதல் முறையாக) என 10 பிரிவுகள் உள்ளன.

நூலக சிறப்புகள்

நூல்களின் எண்ணிக்கை – 62,493. நூலக உறுப்பினர்கள் 22,130 (தமிழகத்திலேயே முதலிடம்), கொடையாளர்கள் – 109, பெரும் புரவலர்கள் – 58, புரவலர்கள் – 199, ஆக புரவலர் வைப்புத் தொகை ரூ.15 லட்சத்து 79 ஆயிரம். (தமிழகத்திலேயே முதலிடம்)நாள் ஒன்றுக்கு வாசகர் வருகை – 1,250. நூல் இரவல் – 500, நூல் கலந்தறிதல் – 550, மொத்தம் – 2300.

கணினி நூலக சிறப்புகள்

கணினி நூலகத்தின் மூலம் தற்போது வரை 352 எளிய மாணவ மாணவியருக்கு 3 மாத கால இலவச திறன் மேம்பாட்டு பயிற்சி எச்.சி.எல். அறக்கட்டளை மற்றும் திருவொற்றியூர் கிளை நூலக வாசகர் வட்டத்தால் வழங்கப்பட்டு வேலைவாய்ப் பெற்றுத்தரப்பட்டுள்ளது.

20 மகளிருக்கு டேலி பயிற்சி இலவசமாக வழங்கப்பட்டுள்ளது. 740 மகளிருக்கு 10 மணி நேர கணினி கல்வி கற்றுத் தரப்பட்டுள்ளது. 2500–க்கும் மேற்பட்ட மாணவ, மாணவியருக்கு இலவச கணினி பயிற்சி வழங்கப்பட்டுள்ளது. இலவச போட்டித்தேர்வு பயிற்சி மையத்தின் மூலம் 200 பேருக்கு ஞாயிற்று கிழமைகளில் பயிற்சி வழங்கப்பட்டு வருகிறது. 12 லேத் தொழிலாளர்களுக்கு சி.என்.சி. எந்திர பயிற்சி கணினி வாயிலாக நம் நூரலகத்திலும், நேரடி எந்திர பயிற்சி அசோக் லேலண்டு தொழிலகத்திலும் கற்றுத் தரப்படுகிறது.

தமிழக அரசு விருதுகள்

2013, 2014 ஆண்டுகளில் தமிழகத்திலேயே அதிக புரவலர்கள் சேர்த்ததற்கான விருது 2015 ஆண்டில் தமிழகத்திலேயே அதிக நன்கொடை பொருட்களை பெற்றதற்கான விருது, 2014, 1016 & 2017 ஆண்டுகளில் தமிழகத்திலேயே அதிக உறுப்பினர்களை சேர்த்ததற்கான விருது என விருதுகள் குவித்துள்ளது.

திருவொற்றியூர் கிளை நூலகத்தில் நடைபெறும் பல்வேறு பயிற்சிகள் மற்றும் சமூக மேம்பாட்டு நிகழ்வுகள் ஐ.நா. சபை நிர்ணயித்துள்ள நிலைத்த வளர்ச்சிக்கான இலக்குகளை அடையும் இலக்குகளாக அறியப்பட்டு அதற்கான விருது நூலகம் பெற்றுள்ளது.

கம்ப்யூட்டர் துறையில் நிபுணத்துவம் பெற்று டெல்லியில் பல்வேறு பயிற்சி வகுப்புகளை நடத்திய எம்.கணேசன் இங்கு அர்ப்பணிப்பு உணர்வுடன் செயல்பட்டு பயிற்சி அளித்து வருகிறார்.


<< < Prev 1 2 3 4 5 6 7 8 9 10 Next > >>